Nyolok Nu Munggaran

Tah, ayeuna munggaran kuring ngadulang kahayang nyolok. Nya wayahna we asa rada aneh-aneh keneh bubuhan munggaran. Nyolok naon cenah? Nya puguh we lain nyolok nu lian-lian. Kuring teh geus sawawa dina segi umur, boh ceuk agama, akil balegna, boh ceuk hukum. Istimewana, kuring keur pas nincak kana umur 17 tahun, anu sok disebut-sebut wates dewasa. Koh aya istilah film jang 17+. Lain maksudna geus halal ningalina, tetep we haram, ngan meureun tina segi ngontrol dirina. Ngan, kumaha bae, nu haram mah haram we….!!!

Saliwat mah umur teh jiga nambahan, padahal hakekatna mah ngurangan, jurujug naratas waktu, kudu dimangpaatkeun masing daria. Kasempetan ieu kuring kamanahan meureun labelna mah ngagunakeun hak keur naangtukeun pamingpin urang keur pikahareupeun. Geus ngaheng panas kuring the ningali babaturan anu geus bisa nyolok dina Pemilu 2004 jeung Pemilu Walikota & Wakil Walikota Tasikmalaya 2007. Ayeuna waktuna, ngan ieu mah leuwih gede deui, nyaeta milih Gupernur & Wakil Gupernur Jawa Barat Periode 2008-2011. Calona mah anu geus teu kudu mindo disaha-saha, nyaeta :

1. Danny Setiawan-Iwan Sulandjana

2. Agum Gumelar

3. Ahmad Heryawan-Dede Yusuf.

Duka ari gular-gelarna mah. Atuh da cumah gelar sapanjang-panjang meakkeun keretas ari pikirana teu parangjang pikeun ruhayat.

Kumaha cenah ari tanggepan masrakat golputer kana pemilu ayeuna? Cenah mah golput soteh lolobana lain aya halangan atawa teu ararapal, cenah mah nasib ruhayat mah kitu keneh kitu keneh. Aya benerna oge, da kaayan dunya ayeung ku Perbawa Murba Wisesa diadab ku resesi ekonomi lah, pamanasan global lah, langka pangan lah, jsb (jeung sayah bingung). Musykilah-musykilah eta anu jadi jurig ka kabehanana. Sanajan meureun kajadian beas turun, sakola haratis, ngan balukarna cenah mah leuwih pabuliwet deui. Nya kitu lah rada hese ngomongkeun politik mah. Ruhayat mah nu penting marurah, kabutuhan aya, da moal ngarti kana bursa efek, valuta asing, barrel, atawa pangaruh dollar. Anu pasti mah masih aya keneh we angina seger harepan anyar ngahiliwir pikeun ruhayat. Tah, serahkeun wae cenah mah ka Gupernur jeung Wakil Gupernur pikeun manggul amanah. Da lolobana dina masa kampanyeu oge masalah anu ngaburudul tina baham nu dikampanyeuan the teu jauh-jauh tina kamiskinan, pangangguran , pendidikan, jeung marahalna harga.